تقرير القناة الايطالية عن قيصر الاغنية العربية الفنان كاظم الساهر / ومجرد رأي من دون رقيب
بدور العبيدي
اليوم شفت بصفحة اخبار الفنان كاظم الساهر هذا التقرير عن نجوم الفن العربي ومن مقدمتهم القيصر كاظم الساهر على التلفزيون الايطالي..
تعليق بسيط احب اضيفه هنا ..
شوفوا العالم شلون يحتفي بالفن العربي وتحديداً المبدع كاظم الساهر.
اليوم شفت بصفحة اخبار الفنان كاظم الساهر هذا التقرير عن نجوم الفن العربي ومن مقدمتهم القيصر كاظم الساهر على التلفزيون الايطالي..
تعليق بسيط احب اضيفه هنا ..
شوفوا العالم شلون يحتفي بالفن العربي وتحديداً المبدع كاظم الساهر.
واحنا الاعلام العراقي مالتنة النزيه وبعض النماذج العراقية الفذة ..ما اريد اكول الناس لا خلوني استبدلها بمصطلح ( نماذج ) افضل من اية تسميات او اعتبارات اخرى ..ناصبين محاكم نزاهة على الفنانين العراقيين وتحديداً كاظم الساهر على حجة
ناسي العراق ..ليش ما تبرعت ليش ما رحت للعراق..ليش ما صرحت على الاحداث ليش ما بجيت ليش ما طلعت مظاهرات ليش ما هوست والخ .
ناسي العراق ..ليش ما تبرعت ليش ما رحت للعراق..ليش ما صرحت على الاحداث ليش ما بجيت ليش ما طلعت مظاهرات ليش ما هوست والخ .
نسينا تماماً بانه الفنان الوحيد اللي كدر بان يكسر الحصار الفني والتعتيم والعزل الاعلامي عن العراق بإحنك الظروف ومنذ التسعينات هو كاظم الساهر.
هذا كله وين صار؟ هذا كوخة لازم ينسي كاظم ماله فضل على العراق.. بس الناس اللي تحارب النجاح ونصبوا انفسهم انهم حكماء المدينة الفاضلة الهم الحق ان ينتقدوا على احداث العراق وكانه هو المسؤل عن هذا الخراب العارم اللي اطاح بالبلد..
احب ابشركم بشغلة مهمة اخاف ما تعرفون بيها هسة اعرفوها والحاضر يبلغ الغايب حبايبي ماشي؟
العراق خرب وانهجمت ديارة بسبب الشعب نفسه.. هسة لا احد يبيع وطنيات براسي ..ليش؟ للتوضيح اكثر تمجيد الطغاة والحكام المستبدين وسفاكي الدماء ( شعب يحب خناكة ..على وزن القط يحب خناكة )
بدل ما نحاسب الفنانين ونخلي الصوج بيهم ما نروح نحاسب اولاً السياسيين واصحاب المناصب والكروش الممتلئة بمليارات الوطن من ايرادات النفط وثروات الشعب نفسه!
بدل ما نحاسب رئيس وزرائنا المبجل النسخة الجديدة من الله يخلي الريس الله يقصر عمرة ونطالب بمحاكمته على المذابج وتهميش الفرد العراقي والقتل على الهوية بزمنه الاغبر
لا نسكت ، ونغض النظر وكان شيئاً لم يكن!!!!
داعش وماعش والماعز تذبح وترهب وتهجر وتقتل على الاساس العرقي والطائفي هذا كله مو مهم اصلاً عادي جداً واذا الشعب نصه اذا مو كله يتهجر؟ يطبهم مرض المهم اهل العراق يتهجولون وينغدر بيهم ويجي بدلهم هجرة مضادة يعني استبدال الشعب العراقي والتخلي عن عنصر الانسان
ويجيبون فئة الحيوانات المفترسة من امثال ( داعش ) تستقر وتاخذ الجنسية العراقية.. وعلى فكرة هذه فكرة غير مستبعدة حتى!
عدكم دولة رائعة جبارة لا تهش ولا تنش..اي عادي واحنة شعلينا؟ عسى نارهم تاكل حطبهم .
او المهزلة الكبرى، هذا الفنان الفلاني شنو مثلاً راح يسويلنا؟ راح يحرر العراق بسلامته.؟ ليش هو تحرير العراق متوقف على الفنان؟ ليش ما انت تروح تحررة بسلامة الوالدة حبيبي؟
زين مو عندي جيش .. الجيش سورٌ للوطن وين راحوا؟ لعد هذولة شنو شغلهم اذا الفنان والانسان اللي على كد حالة واللي ببداية مشوارة الفني يترك كلشي بالحياة ويجي يحررلك العراق. حتى انت تجي تصفكله وتكوله عفية عليك والله كبرت بنظري وصرت احترمك لان طلعت من صدك وطني!!
وغيرها وغيرها القائمة تطول الشرح وتعبر حدود الوصف اصلاً.
كل هذا يهون .. لكن لازم والموضوع اجباري بحت انه نحاسب الفنانين والمثقفين بدمار العراق لان همه السبب
وشلون تنكروا لبلدهم وباعوا القضية..
هههههههههه والله احنا ناس عجيب امور غريب قضية.. وصدك لو كالو اذا كنت لا تستحي ففعل ما تشاء
ورجاءاً لا احد يجيني هسة يبيع مثاليات براسي لان شبعت من هذه الاسطوانة التعبانة ..عندك رأي محترم ،مقنع، وموزون اهلاً بيك
اذا لا فياريت تحتفظ برأيك لنفسك لان الموضوع عندي هذا تحديداً غير قابل للنقاش .
اتمنى من عدكم تشوفون هذا التقرير وتفرحون للحياة .. تفرحون بان اسم العراق ينذكر لان هناك من يمثله بصورة حضارية مشرفة
افتخروا وافرحوا لأبناء بلدكم .. لانهم يستحقون الكلمة الطيبة منا لا اكثر .
التقرير كاملاً:
This comment has been removed by a blog administrator.
ReplyDelete